بيض الله وجيههم جمعو رااسين بالحلال..!! عشان خدمه 11 سنه..!!
فاطمة ، او فطوم فلبينية كما يطلقون عليها ، عملت لدى عائلة قطرية كخادمة مدة 11 سنة متوالية وبدون اجازات ، أحبتهم وأحبوها ، وأصبحت مثل بنتهم وأختهم ، ففي يوم من الايام جاءت فاطمة الى معزبتها ربة الاسرة وقالت : ماما ! انا في رجال يسوي كلام بابا مال انا داخل فلبين ، يبي انا عروس ( الترجمة: خطبني رجال من ابوي في الفلبين )
المعزبة : مبرووووك فطوم ، بس انتي ليش زعلانه؟؟
فاطمة : انا لو في عروس كيف انا بعدين ترشي فلوس ألشان بابا مال انا؟ ( الترجمة : لو انا تزوجت اشلون بعدين اطرش فلوس حق ابوي؟)
المعزبة : ولايهمج فطوم ، انا ازوجج أحسن زواج وأجيب خطيبج هني الدوحة وأزوجكم
وطارت المسكينه الفلبينية من الفرحة ، ومن فرحتها بغت اتخم وتنظف الفريج كله.
من هنا بدأت قصة الزواج ، التي تكفل بها مخدومي فطوم ، وانا كنت شاهدا وحاضرا في هذا الزواج الرائع وبأيجاز بوصف لكم العرس:-
اولا طبعا العائلة تكريما وعرفانا لفطوم والعشرة اللي بينهم جابوا المعرس من الفلبين وعلى حسابهم وسكنوه في بيتهم وعدلوا لهم الغرفة ، صبغ جديد وغرفة نوم وزل على كيفكم ، والمعرس جايب معاه المسكين البدلة السودة ولكن المعزبة قالت حق عيالها فصلوله ثياب وجيبو له بشت ، وبالفعل تم ما أرادت الام
اما يوم الزواج الرجال والمعازيم من القطريين والفلبينيين المسلمين وحديثي الاسلام ، والعشا : ذبايح ماشاء الله.
وفطوم جابوا لها كوشة ، ودي جي اسلامي (DJ) ، و بوفيه من أحد المطاعم الفاخرة ، والمعازيم من القطريات والفلبينيات وصديقات فطوم من خادمات الفريج ، وكل هذا على حساب عائلة المرحوم / احمد بن عبدالله العبيدلي وأقيم الحفل في منزلهم العامر في منطقة معيذر بتاريخ 19/4/2007
هذي صورة العريس مع كفلاء العروسة..!!
وهذي صورة العريس فاق الخشة (( يعني مبسوط على الاخر))
هذي صورة العريس مع ولد عمة تبوون الصراحه والله انه كشخه :460:
وهذي الصورة للعريس مع جماعتة. والله انهم ماقصرو حتى جماعتهم جابوهم..!!
وانتهى العرس والحين هم في سعااده مايعلم بها الا الله ....!!
هلا والله
والله ما ادري وش ارد.............
شي حلو نشوف رد الجميل وتقدير 11 سنه خدمه ...
واللي ابي اكتبه ومو طلع معي هو ان شالله ان شالله نشوفه في التأمينات الاجتماعيه وبالشركات اللي بنخدمها اكثر من هلموده عسا عسا يبان فيهم...............
متغرب
عائلة قطرية تقيم حفل زفاف بهيج لخادمتهم بالصور
